CTU ਦੇ ਨਿੱਜੀਕਰਨ ਖਿਲਾਫ਼ ਏਟਕ ਵੀ ਆਈ ਖੁੱਲ ਕੇ ਮੈਦਾਨ ਵਿੱਚ

 11 ਮਈ 2021 ਦੇ ਚੱਕਾ ਜਾਮ ਦਾ ਕੀਤਾ ਪੁਰਜ਼ੋਰ ਸਮਰਥਨ

ਚੰਡੀਗੜ੍ਹ: 10 ਮਈ 2021: (ਕਾਮਰੇਡ ਸਕਰੀਨ ਡੈਸਕ)::

ਆਏ ਦਿਨ ਕੋਰੋਨਾ ਕਾਰਨ ਹੋ ਰਹੀਆਂ ਮੌਤਾਂ ਅਤੇ ਲਾਕਡਾਊਨ ਕਾਰਨ ਵੱਧ ਰਹੀ ਮੰਦੀ ਵਾਲੀ ਸਥਿਤੀ ਗੰਭੀਰ ਹੁੰਦੀ ਜਾ ਰਹੀ ਹੈ।ਸਨ 2020 ਵਿੱਚ ਜਦੋਂ ਕੋਰੋਨਾ ਵਾਲੀ ਮੁਸੀਬਤ ਆਈ ਸੀ ਤਾਂ ਉਦੋਂ ਵੀ ਲੋਕਾਂ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ ਸੀ। ਨਿੱਕੀਆਂ ਨਿੱਕੀਆਂ ਦੁਕਾਨਾਂ ਅਤੇ ਕਾਰੋਬਾਰ ਬੰਦ ਹੋ ਗਏ ਸਨ। ਜਿਹਨਾਂ ਨੇ ਉਹਨਾਂ ਸਮਿਆਂ ਵਿੱਚ ਹੀ ਕਰਜ਼ੇ ਲੈ ਕੇ ਛੋਟੇ ਛੋਟੇ ਕਾਰੋਬਾਰ ਸ਼ੁਰੂ ਕੀਤੇ ਸਨ ਉਹ ਸਾਰੇ ਇਸ ਤਾਲਾਬੰਦੀ ਕਾਰਨ ਬੰਦ ਹੋ ਗਏ ਸਨ। ਪਰਿਵਾਰ ਚਲਾਉਣ ਦੀ ਮੁਸ਼ਕਿਲ ਹਰ ਰੋਜ਼ ਵਧੇਰੇ ਭਿਆਨਕ ਬਣ ਕੇ ਸਾਹਮਣੇ ਆਉਣ ਲੱਗੀ ਸੀ। ਇਸ ਨਾਜ਼ੁਕ ਹਾਲਤ ਵਿੱਚ ਜਿਹੜੀਆਂ ਲੋਕ ਪੱਖੀ ਸ਼ਕਤੀਆਂ ਲੋਕਾਂ ਦੀ ਮਦਦ ਲਈ ਸਾਹਮਣੇ ਆਈਆਂ ਉਹਨਾਂ ਵਿੱਚ ਕਾਮਰੇਡ ਵੀ ਮੂਹਰਲੀ ਕਤਾਰ ਵਿੱਚ ਸਨ।  ਕਾਮਰੇਡਾਂ ਅਤੇ ਹੋਰ ਟ੍ਰੇਡ ਯੂਨੀਅਨਾਂ ਦਾ ਧਿਆਨ ਰਾਸ਼ਨ ਵੰਡ ਵਰਗੇ ਪਾਸੇ ਹੁੰਦਿਆਂ ਸਾਰ ਹੀ ਸਰਕਾਰਾਂ ਨੇ ਆਪਣੀ ਚਾਲ ਚੱਲਣੀ ਸ਼ੁਰੂ ਕਰ ਦਿੱਤੀ। ਲੋਕਾਂ ਅਤੇ ਮਜ਼ਦੂਰਾਂ ਦੇ ਖਿਲਾਫ ਅਜਿਹੇ ਕਾਨੂੰਨ ਸਾਹਮਣੇ ਆਉਣ ਲੱਗੇ ਜਿਹੜੇ ਨੰਗੇ ਚਿੱਟੇ ਤੌਰ ਤੇ ਅੰਬਾਨੀਆਂ ਅਡਾਨੀਆਂ ਵਰਗੇ ਪੂੰਜੀਪਤੀਆਂ ਦੇ ਹਿੱਤ ਪੂਰਦੇ ਸਨ। ਇਸ ਮੁਹਿੰਮ ਅਧੀਨ ਹੀ ਨਿਜੀਕਰਨ ਨੂੰ ਮਜ਼ਬੂਤ ਕਰਨ ਅਤੇ ਪਬਲਿਕ ਸੈਕਟਰ ਨੂੰ ਕਮਜ਼ੋਰ ਕਰਨ ਦਾ ਨਿਸ਼ਾਨਾ ਬੜੀ ਹੀ ਬੇਸ਼ਰਮੀ ਨਾਲ ਮਿੱਥ ਲਿਆ ਗਿਆ। ਇਸੇ ਸਿਲਸਿਲੇ ਅਧੀਨ ਵਾਰੀ ਆਈ ਚੰਡੀਗੜ੍ਹ ਟਰਾਂਸਪੋਰਟ ਅੰਡਰਟੇਕਿੰਗ ਦੀ। ਹਰਮਨ ਪਿਆਰੇ ਟਰਾਂਸਪੋਰਟ ਅਦਾਰੇ ਸੀਟੀਯੂ ਨੂੰ ਪ੍ਰਾਈਵੇਟ ਹੱਥਾਂ ਵਿੱਚ ਦੇਣ ਵਾਲਿਆਂ ਸਾਜ਼ਿਸ਼ਾਂ ਸਿਰੇ ਚਾੜ੍ਹੀਆਂ ਜਾਣ ਲੱਗ ਪਈਆਂ। ਸੀਟੀਯੂ ਦੇ ਹੱਕ ਵਿੱਚ ਹਾਅ ਦਾ ਨਾਅਰਾ ਮਾਰਨ ਲਈ ਅੱਗੇ ਆਈ ਹੈ ਖੱਬੇ ਪੱਖੀ ਟਰੇਡ ਯੂਨੀਅਨ ਜੱਥੇਬੰਦੀ ਏਟਕ ਅਰਥਾਤ ਆਲ ਇੰਡੀਆ ਟਰੇਡ ਯੂਨੀਅਨ ਕਾਂਗਰਸ। ਏਟਕ ਨੇ ਨਿਜੀਕਰਨ ਦੇ ਇਸ ਮੁੱਦੇ ਨੂੰ ਉਠਾਉਂਦਿਆਂ ਮੁਲਾਜ਼ਮਾਂ ਦੀ ਪੁਰਜ਼ੋਰ ਹਮਾਇਤ ਕੀਤੀ ਹੈ। 

ਏਟਕ ਚੰਡੀਗੜ੍ਹ ਦੇ ਪ੍ਰਧਾਨ ਸਾਥੀ ਰਾਜ ਕੁਮਾਰ ਅਤੇ ਜਨਰਲ ਸਕੱਤਰ ਸਤਿਆਵੀਰ ਨੇ ਇੱਕ ਸਾਝੇ ਬਿਆਨ ਵਿਚ ਦਸਿਆ ਕਿ ਸੀ. ਟੀ. ਯੂ. ਵਰਕਰਜ਼ ਯੂਨੀਅਨ ਵੱਲੋਂ ਅਦਾਰੇ ਦੇ ਨਿੱਜੀਕਰਨ ਖਿਲਾਫ਼ 11 ਮਈ 2021 ਨੂੰ ਦੁਪਹਿਰੇ 12 ਤੋਂ 2 ਵਜੇ ਤਕ ਬੱਸਾਂ ਦਾ ਚੱਕਾ ਜਾਮ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਏਟਕ ਇਸ ਚੱਕਾ ਜਾਮ ਦਾ ਸਮਰਥਨ ਕਰਦੀ ਹੈ ਅਤੇ ਏਟਕ ਦੇ ਸਾਥੀ ਇਸ ਸੰਘਰਸ਼ ਵਿਚ ਹਮੇਸ਼ਾਂ ਸ਼ਾਮਲ ਹੋਣਗੇ। ਉਨ੍ਹਾਂ ਕਿਹਾ ਕਿ ਅਦਾਰੇ ਦੇ ਨਿੱਜੀਕਰਨ ਦੇ ਨਾਲ ਨਾਲ ਪ੍ਰਸਾਸ਼ਨ ਇਲੇਕਟਰੌਨਿਕ ਬੱਸਾਂ ਵੀ ਸ਼ਹਿਰ ਵਿਚ ਨਿੱਜੀ ਕੰਪਨੀਆਂ ਦੀ ਮਦਦ ਨਾਲ ਚਲਾਉਣਾ ਚਾਹੁੰਦੀ ਹੈ ਜੋ ਕੀਮਤ ਅਤੇ ਪ੍ਰਤੀ ਕਿਲੋਮੀਟਰ ਲਾਗਤ ਵਿਚ ਮਹਿੰਗੀਆਂ ਹਨ ਅਤੇ ਪੁਰਾਣੀਆਂ ਬੱਸਾਂ ਨਾਲੋਂ ਅੱਧੀਆਂ ਸਵਾਰੀਆਂ ਹੀ ਢੋਣਗੀਆਂ। ਉਨ੍ਹਾਂ ਕਿਹਾ ਕਿ ਨਿੱਜੀ ਕੰਪਨੀਆਂ ਦੇ ਆਉਣ ਨਾਲ ਡਰਾਇਵਰਾਂ ਉਤੇ ਛਾਂਟੀ ਦੀ ਤਲਵਾਰ ਲਟਕ ਰਹੀ ਹੈ। ਉਨ੍ਹਾਂ ਚੰਡੀਗੜ੍ਹ ਪ੍ਰਸਾਸ਼ਨ ਤੋਂ ਮੰਗ ਕੀਤੀ ਕਿ ਸੀ. ਟੀ. ਯੂ. ਵਰਕਰਜ਼ ਯੂਨੀਅਨ ਦੀਆਂ ਮੰਗਾਂ ਫੌਰੀ ਤੌਰ ਤੇ ਮੰਨੀਆਂ ਜਾਣ ਵਰਨਾ ਏਟਕ ਇਸ ਸੰਘਰਸ਼ ਨੂੰ ਹੋਰ ਤਿਖਾ ਕਰੇਗੀ।

C T U ਵਿੱਚ 11 ਮਈ ਦੀ ਹੜਤਾਲ ਕਿਉ ਅਤੇ ਜਿੰਮੇਵਾਰ ਕੌਣ?

ਆਖਿਰ ਲੋਕ ਪੁੱਛ ਸਕਦੇ ਹਨ ਕਿ ਇਸ ਹੜਤਾਲ ਲਈ ਜ਼ਿੰਮੇਵਾਰ ਕੌਣ ਹੈ? ਇਸ ਸਹਿਮ ਸੁਆਲ ਦਾ ਜੁਆਬ ਲੱਭਦੀਆਂ ਕਈ ਗੱਲਾਂ ਸਾਹਮਣੇ ਆਉਂਦੀਆਂ ਹਨ। ਸਬੰਧਤ ਮੁਲਾਜ਼ਮਾਂ ਨਾਲ ਜੁੜੇ ਸੂਤਰ ਦੱਸਦੇ ਹਨ ਕਿ  ਅਸਲ ਵਿੱਚ CTU ਮੈਨੇਜਮੈਂਟ ਵੱਲੋਂ ਪਿਛਲੇ ਚਾਰ ਪੰਜ ਸਾਲਾਂ ਤੋਂ ਅਦਾਰੇ ਨੂੰ ਖੋਰਾ ਲਾਉਣ ਦੀਆਂ ਨੀਤੀਆਂ ਬਣਾਈਆਂ ਜਾ ਰਹੀਆਂ ਹਨ।

ਸਾਨੂੰ ਸੂਚਨਾ ਦੇਣ ਵਾਲੇ ਇਹਨਾਂ ਸੋਮਿਆਂ ਨੇ ਦੱਸਿਆ ਕਿ ਪਹਿਲਾਂ ਚਾਰ ਨੰਬਰ ਡੀਪੂ ਨੂੰ ਜਵਾਹਰ ਲਾਲ ਨਹਿਰੂ ਨੈਸ਼ਨਲ ਰੂਰਲ ਮਿਸ਼ਨ ਵਾਲੀ ਸਕੀਮ ਦੇ ਹੇਠ ਪ੍ਰਾਈਵੇਟ ਹੱਥਾਂ ਵਿਚ ਦਿੱਤਾ ਗਿਆ। ਇਸ ਦੇ ਨਾਲ ਹੀ ਨੀਤੀਆਂ ਲੋਕ ਮਾਰੂ ਹੁੰਦੀਆਂ ਚਲੀਆਂ ਗਈਆਂ। 

ਇਸੇਤਰ੍ਹਾਂ ਪਿਛਲੇ ਸਾਲ 2 ਨੰਬਰ ਵਰਕਸ਼ਾਪ ਦਾ ਰਿਪੇਅਰ ਵਾਲਾ  ਕੰਮ  ਠੇਕੇਦਾਰ ਨੂੰ ਦੇ ਕੇ ਕਮਿਸ਼ਨ ਖਾਣ ਦਾ ਹੀਲਾ ਕਰ ਲਿਆ ਗਿਆ ਅਤੇ ਯੂਨੀਅਨ ਵੱਲੋਂ ਅਪੀਲ ਕਰਨ ਦੇ ਬਾਵਜੂਦ ਇਸ ਘਪਲੇ ਦੀ ਜਾਂਚ ਨਹੀ ਕਾਰਵਾਈ ਗਈ।

ਹੁਣ ਨਿਜੀਕਰਨ ਵਾਲੇ ਇਹਨਾਂ ਰਸਤਿਆਂ ਤੇ ਚੱਲਦਿਆਂ ਹੀ ਇਹਨਾਂ  417 ਬੱਸਾਂ ਦੇ ਮਨਜ਼ੂਰ ਹੋਏ ਫਲੀਟ ਨੂੰ ਖੋਰਾ ਲਾਇਆ ਜਾ ਰਿਹਾ ਹੈ।

ਇਸਦੇ ਨਾਲ ਹੀ ਇਲੈਕਟ੍ਰਿਕ ਬੱਸਾਂ ਪ੍ਰਾਈਵੇਟ ਠੇਕੇਦਾਰ ਦੇ ਅਧੀਨ ਕਿਲੋਮੀਟਰ ਵਾਲੇ ਆਧਾਰ ਤੇ ਪਾਈਆਂ ਜਾ ਰਹੀਆਂ ਹਨ। ਇਹ ਸਭ ਕੁਛ CTU ਮੈਨੇਜਮੈਂਟ ਅਤੇ ਚੰਡੀਗੜ੍ਹ ਪ੍ਰਸ਼ਾਸ਼ਨ ਦੇ ਅਫ਼ਸਰਾਂ ਦੀ ਮਿਲੀ ਭੁਗਤ ਨਾਲ ਮੋਟਾ ਕਮਿਸ਼ਨ ਖਾ ਕੇ ਅਦਾਰੇ ਨੂੰ ਖਤਮ ਕਰਨ ਦੀ ਕੋਝੀ ਚਾਲ ਹੈ। 

ਇਸ ਹਰਮਨ ਪਿਆਰੇ ਅਦਾਰੇ ਨੂੰ ਡੋਬਣ ਦੇ ਮਕਸਦ ਨਾਲ ਹੀ ਮਨਜ਼ੂਰਸ਼ੁਦਾ 200 ਬੱਸਾਂ ਵਿਚੋਂ ਬਚਦੀਆਂ ਬੱਸਾਂ ਨਹੀਂ ਮੰਗਾਈਆ ਜਾ ਰਹੀਆਂ। ਸੰਨ 1991 ਤੋਂ ਬਾਅਦ ਆਦਾਰੇ ਵਿਚ ਵਰਕਸ਼ਾਪ ਸਟਾਫ ਦੀ ਭਰਤੀ ਵੀ ਨਹੀਂ ਕੀਤੀ ਗਈ। ਲੰਮੇ ਸਮੇਂ ਤੋਂ ਡਰਾਈਵਰ ਤੇ ਕੰਡਕਟਰ ਦੀ ਭਰਤੀ ਨਹੀਂ ਕੀਤੀ ਜਾ ਰਹੀ ਜਦ ਕਿ ਇਸ ਦੇ ਉਲਟ ਪ੍ਰਾਈਵੇਟ ਠੇਕੇਦਾਰ ਅਧੀਨ ਪਿਛਲੇ ਦਰਵਾਜ਼ੇ ਰਾਹੀਂ ਤਕਰੀਬਨ 1200 ਕੱਚੇ ਕਾਮੇ ਭਰਤੀ ਕਰਕੇ ਠੇਕੇਦਾਰ ਤੋਂ ਮੋਟਾ ਕਮਿਸ਼ਨ ਖਾਧਾ ਜਾ ਰਿਹਾ ਹੈ ਅਤੇ ਕੱਚੇ ਕਾਮਿਆਂ ਨੂੰ ਓਹਨੇ ਦੇ ਬਣਦੇ ਹੱਕ ਨਹੀਂ ਦਿੱਤੇ ਜਾ ਰਹੇ। ਸਥਿਤੀ ਕਿੰਨੀ ਭਿਆਨਕ ਹੁੰਦੀ ਜਾ ਰਹੀ ਹੈ ਇਸਦਾ ਅੰਦਾਜ਼ਾ ਇਹਨਾਂ ਗੱਲਾਂ ਤੋਂ ਸਹਿਜੇ ਹੀ ਲਾਇਆ ਜਾ ਸਕਦਾ ਹੈ।  

ਡਾਇਰੈਕਟਰ ਟਰਾਂਸਪੋਰਟ ਵਲੋਂ ਕੋਰਟ ਵਿੱਚ ਗ਼ਲਤ ਐਫੀਡੇਵਿਟ ਫਾਈਲ ਕਰਕੇ ਵੀਕਲੀ ਰੈਸਟ ਦੇ ਨਾਮ ਤੇ ਯੂਨੀਅਨ ਅਤੇ ਵਰਕਰਾਂ ਨੂੰ ਜਨਰਲ ਮੈਨੇਜਰ ਨਾਲ ਮਿਲ ਕੇ ਬਲੈਕਮੇਲ ਕੀਤਾ ਜਾ ਰਿਹਾ ਹੈ। ਇਹ ਇੱਕ ਵੱਖਰੀ ਕਿਸਮ ਦੀ ਚਾਲ ਹੈ ਜਿਹੜੀ ਵਰਕਰਾਂ ਨੂੰ ਕਮਜ਼ੋਰ ਕਰਨ ਦੇ ਮਕਸਦ ਨਾਲ ਵਰਤੀ ਜਾ ਰਹੀ ਹੈ। ਇਸੇ ਤਰ੍ਹਾਂ ਸ਼ਾਮ ਸਵੇਰ ਦਾ ਕੈਸ਼ ਇਕੱਠਾ ਨਾ ਜਮਾ ਕਰਕੇ ਵੀ  ਕੰਡਕਟਰ ਅਤੇ ਸਟਾਫ ਨੂੰ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਪਿਛਲੇ ਤਿੰਨ ਸਾਲਾਂ ਵਿਚ ਡਾਇਰੈਕਟਰ ਟਰਾਂਸਪੋਰਟ ਕਦੇ ਵੀ ਵਰਕਰਾਂ ਦੀਆਂ ਮੁਸ਼ਕਿਲਾਂ ਸੁਣਨ ਲਈ CTU ਦਫ਼ਤਰ ਨਹੀਂ ਬੈਠਿਆ। ਹੁਣ ਵਰਕਰ ਆਪਣੇ ਮਸਲੇ ਕਿਸ ਦੇ ਸਾਹਮਣੇ ਰੱਖਣ?  ਅਜਿਹਾ  ਬਹੁਤ ਕੁਝ ਲਗਾਤਾਰ ਹੋ ਰਿਹਾ। ਡਰਾਈਵਰ ਸਟਾਫ ਨੂੰ ਐਕਸੀਡੈਂਟ ਕੇਸ ਵਿੱਚ ਨਜਾਇਜ ਰਿਕਵਰੀਆਂ ਪਈਆਂ ਜਾ ਰਹੀਆਂ ਹਨ।ਕੋਰਟ ਵਿੱਚੋਂ ਬਰੀ ਹੋ ਚੁੱਕੇ ਡਰਾਈਵਰਾਂ ਨੂੰ ਵੀ ਵਿਭਾਗੀ ਜਾਂਚ ਵਿਚ ਦੋਸ਼ੀ ਠਹਿਰਾ ਕੇ ਗ਼ਲਤ ਸਜ਼ਾਵਾਂ ਦਿੱਤੀਆਂ ਜਾ ਰਹੀਆਂ ਹਨ।ਏਸੇ ਤਰ੍ਹਾਂ ਸ਼ਰਤਾਂ ਪੂਰੀਆਂ ਕਰਦੇ ਕੰਡਕਟਰ ਸਟਾਫ ਨੂੰ ਸਬ ਇੰਸਪੈਕਟਰ ਨਹੀਂ ਬਣਾਇਆ ਜਾ ਰਿਹਾ ਅਤੇ ਚਾਰ ਮਹੀਨਿਆਂ ਤੋਂ ਲਾਰੇ ਲਾਏ ਜਾ ਰਹੇ ਹਨ। 

ਇਹ ਨਹੀਂ ਕਿ ਇਹਨਾਂ ਮਸਲਿਆਂ ਨੂੰ ਲੈ ਕੇ ਗੱਲਾਂਬਾਤਾਂ ਨਹੀਂ ਹੋਈਆਂ। ਇਹ ਸਿਲਸਿਲੇ ਵੀ ਚੱਲਦੇ ਰਹੇ ਹਨ ਪਰ ਜਿਹਨਾਂ ਜਿਹਨਾਂ ਮੁੱਦਿਆਂ ਤੇ ਗੱਲ ਸਿਰੇ ਲੱਗਦੀ ਸੀ ਉਹਨਾਂ ਮੁੱਦਿਆਂ ਨੂੰ ਹੀ ਅੱਖੋਂ ਪਰੋਖੇ ਕਰ ਦਿੱਤਾ ਜਾਂਦਾ ਸੀ। ਟਰਾਂਸਪੋਰਟ ਸਕੱਤਰ  ਨਾਲ 12 ਮਾਰਚ 2021 ਨੂੰ ਕੀਤੀ ਗਈ ਮੀਟਿੰਗ ਵਿੱਚ ਹੋਏ ਸਮਝੌਤੇ ਕਦੇ ਲਾਗੂ ਨਹੀਂ ਕੀਤੇ ਗਏ।

ਟਰਾਂਸਪੋਰਟ ਸੇਕ੍ਰੇਟਰੀ ਦੇ ਆਦੇਸ਼ਾਂ ਦੇ ਬਾਵਜੂਦ ਪਿਛਲੇ ਦੋ ਮਹੀਨਿਆਂ ਤੋਂ ਯੂਨੀਅਨ ਨਾਲ ਜਨਰਲ ਮੈਨੇਜਰ ਨੇ ਕੋਈ ਮੀਟਿੰਗ ਨਹੀਂ ਕੀਤੀ। ਮੁਲਾਜ਼ਮਾਂ ਨਾਲ ਦੂਰੀ ਵਧਾਉਣ ਵਾਲਾ ਅਜਿਹਾ ਵਤੀਰਾ ਕਿਓਂ ਅਤੇ ਕਿਸਦੇ ਕਹਿਣ ਤੇ?

ਲੌਂਗ ਰੂਟ ਦਾ ਕਿਰਾਇਆ ਯੂਨੀਅਨ ਵੱਲੋਂ ਲਿਖ ਕੇ ਦੇਣ ਦੇ ਬਾਵਜੂਦ ਰਾਊਂਡ  ਫਿਗਰ ਨਹੀਂ ਕੀਤਾ ਗਿਆ।

ਲੋਕਲ ਰੂਟਾਂ ਦਾ ਸਮਾਂ ਬਿਨਾ ਵਜ੍ਹਾ ਘਟ ਕਰ ਦਿੱਤਾ ਗਿਆ ਹੈ।

ਆਦਾਰੇ ਵਿਚ ਕੰਮ ਕਰਦੇ ਕਰਮਚਾਰੀਆਂ ਦੇ ਵੈਕਸਿਨ ਲਗਾਉਣ ਦਾ ਕੋਈ ਪ੍ਰਬੰਧ ਵਿਭਾਗ ਵਲੋਂ ਨਹੀਂ ਕੀਤਾ ਗਿਆ ਜਦ ਕਿ ਸਾਡੇ ਮੁਲਾਜ਼ਮ ਰਿਸਕ ਲੇ ਕੇ ਡਿਊਟੀ ਕਰ ਰਹੇ ਹਨ।

ਰਾਜਨੀਤਿਕ ਸਿਫਾਰਿਸ਼ਾਂ ਮੰਨ ਕੇ ਡਾਇਰੈਕਟਰ ਟਰਾਂਸਪੋਰਟ ਵਲੋਂ ਅਦਾਰੇ ਵਿਚ ਬਹੁਤ ਸਾਰੇ ਜੂਨੀਅਰ ਕਰਮਚਾਰੀਆਂ ਨੂੰ ਅਹਿਮ ਅਹੁਦਿਆਂ ਉਪਰ ਤੈਨਾਤ ਕੀਤਾ ਹੋਇਆ ਹੈ ਅਤੇ ਯੂਨੀਅਨ ਦੇ ਬਾਰ ਬਾਰ ਅਪੀਲ ਕਰਨ ਤੇ ਵੀ ਓਹਨਾ ਨੂੰ ਰੂਟਾਂ ਤੇ ਨਹੀਂ ਭੇਜਿਆ ਜਾ ਰਿਹਾ।

ਮੈਨੇਜਮੈਂਟ ਵਲੋਂ ਆਪਣੇ ਕੁਛ ਚਹੇਤਿਆਂ ਦੀਆਂ ਗ਼ਲਤ ਸਲਾਹਾਂ ਤੇ ਰੋਜ਼ ਹੀ ਵਰਕਰ ਮਾਰੂ ਫੈਸਲੇ ਕੀਤੇ ਜਾ ਰਹੇ ਹਨ।

ਇਹਨਾਂ ਸਾਰੇ ਗ਼ਲਤ ਫੈਸਲਿਆਂ ਦੇ ਖਿਲਾਫ ਯੂਨੀਅਨ ਵਲੋਂ 11 ਮਈ 2021 ਨੂੰ 17 ਬਸ ਸਟੈਂਡ ਉਪਰ ਦੁਪਹਿਰ 12 ਤੋਂ 2 ਵਜੇ ਤਕ ਬੱਸਾਂ ਦਾ ਚੱਕਾ ਜਾਮ ਕੀਤਾ ਜਾਵੇਗਾ। ਇਸ ਮੌਕੇ CTU ਨੂੰ ਪਿਆਰ ਕਰਨ ਵਾਲੇ ਸਾਰੇ ਕਰਮਚਾਰੀਆਂ ਨੂੰ ਅਪੀਲ ਕੀਤੀ ਜਾਂਦੀ ਹੈ ਕੇ ਆਦਾਰੇ ਨੂੰ ਬਚਾਉਣ ਲਈ ਸਹਿਯੋਗ ਦਿਓ ਤਾਂ ਜੋ ਅਫ਼ਸਰਸ਼ਾਹੀ ਨੂੰ ਗ਼ਲਤ ਫੈਸਲੇ ਕਰਨ ਤੋਂ ਰੋਕਿਆ ਜਾ ਸਕੇ

ਇਸ ਅਪੀਲ ਨੂੰ ਜਾਰੀ ਕਰਨ ਵਾਲਿਆਂ ਵਿੱਚ ਸ਼ਾਮਲ ਹਨ-ਪ੍ਰਧਾਨ-ਧਰਮਿੰਦਰ ਸਿੰਘ ਰਾਹੀ, ਵਾਈਸ ਪ੍ਰਧਾਨ-ਚਰਨਜੀਤ ਸਿੰਘ ਢੀਂਡਸਾ, ਜਨਰਲ ਸਕੱਤਰ-ਸਤਿੰਦਰ ਸਿੰਘ ਅਤੇ ਕੈਸ਼ੀਅਰ-ਤੇਜਬੀਰ ਸਿੰਘ।