ਸੀ.ਪੀ.ਆਈ ਅਤੇ ਏਟਕ ਵੱਲੋਂ ਸਾਥੀ ਸੱਜਣ ਸਿੰਘ ਨੂੰ ਸ਼ਰਧਾਂਜਲੀ

 15th  May 2021 at 06:37 PM

ਕੋਰੋਨਾ ਦੇ ਕਹਿਰ ਨੇ ਖੋਹ ਲਈ ਇੱਕ ਹੋਰ ਸ਼ਖ਼ਸੀਅਤ 

ਚੰਡੀਗੜ੍ਹ: 15 ਮਈ 2021: (ਕਾਮਰੇਡ ਸਕਰੀਨ ਬਿਊਰੋ)::

ਸਾਥੀ ਸੱਜਣ ਸਿੰਘ ਜੀ ਸਦੀਵੀ ਵਿਛੋੜਾ ਦੇ ਗਏ ਹਨ। ਸਾਥੀ ਰਾਜ ਕੁਮਾਰ ਸਕੱਤਰ, ਜ਼ਿਲ੍ਹਾ ਕੌਂਸਲ ਚੰਡੀਗੜ੍ਹ ਅਤੇ ਏਟਕ ਚੰਡੀਗੜ੍ਹ ਦੇ ਨੇਤਾ ਦੇਵੀ ਦਿਆਲ ਸ਼ਰਾਮਾ ਅਤੇ ਸਤਿਆਵੀਰ  ਨੇ ਸਾਂਝੇ ਬਿਆਨ ਵਿਚ ਦਸਿਆ ਕਿ ਸਾਥੀ ਸੱਜਣ ਸਿੰਘ 85 ਸਾਲ ਦੇ ਸਨ ਅਤੇ ਕਰੋਨਾ ਦੀ ਲਪੇਟ ਵਿਚ ਆ ਗਏ ਸਨ। ਉਹ ਮੁਲਾਜ਼ਮਾਂ ਦੀ ਬਿਹਤਰੀ ਲਈ ਸਦਾ ਤਿਆਰ-ਬਰ-ਤਿਆਰ ਰਹਿੰਦੇ ਸਨ। ਉਹ ਹਰ ਧਰਨੇ, ਮੁਜ਼ਾਹਰੇ ਅਤੇ ਗਿਰਫ਼ਤਾਰੀਆਂ ਸਮੇਂ ਅੱਗੇ ਹੋ ਕੇ ਕਿਰਤੀਆਂ ਅਤੇ ਮੁਲਾਜ਼ਮਾਂ ਦੀ ਰਹਿਨੁਮਾਈ ਕਰਦੇ ਸਨ। ਉਹ ਬੜੇ ਮਿਠਬੋਲੜੇ, ਸਿਰੜੀ, ਸ਼ਾਂਤ ਚਿੱਤ ਅਤੇ ਦੂਰ-ਦ੍ਰਿਸ਼ਟੀ ਵਾਲੇ ਮੁਲਾਜ਼ਮ ਨੇਤਾ ਸਨ। ਉਹ ‘ਮੁਲਾਜ਼ਮ ਸੰਦੇਸ਼’ ਦੇ ਸੰਪਾਦਕੀ ਬੋਰਡ ਮੈਂਬਰ ਵੀ ਸਨ। ਉਹ ਦਰਜਾ ਚਾਰ  ਮੁਲਾਜ਼ਮ ਫੈਡਰੇਸ਼ਨ ਦੇ ਲੰਮਾ ਸਮਾਂ ਪ੍ਰਧਾਨ ਰਹੇ ਅਤੇ ਹੁਣ ਸਰਪ੍ਰਸਤ ਸਨ।

ਸਾਥੀ ਰਾਜ ਕੁਮਾਰ, ਸਕੱਤਰ ਜ਼ਿਲ੍ਹਾ ਕੌਂਸਲ ਅਤੇ ਅਗਜ਼ੈਕਟਿਵ ਮੈਬਰਾਂ ਸਰਬਸ਼੍ਰੀ ਪ੍ਰੀਤਮ ਸਿੰਘ ਹੁੰਦਲ, ਕਰਮ ਸਿੰਘ ਵਕੀਲ, ਜੋਗਿੰਦਰ ਸ਼ਰਮਾ, ਸੁਰਜੀਤ ਕੌਰ ਕਾਲੜਾ, ਅਮ੍ਰਿਤ ਲਾਲ, ਸ਼ੰਗਾਰਾ ਸਿੰਘ, ਅੈਸ. ਅੈਸ. ਕਾਲੀ ਰਮਨਾ, ਧਰਮਿੰਦਰ ਸਿੰਘ, ਦਿਲਬਾਗ ਸਿੰਘ, ਗੁਰਚਰਨ ਸਿੰਘ ਅਤੇ ਪ੍ਰਲਾਦ ਸਿੰਘ ਨੇ ਸਾਥੀ ਸੱਜਣ ਸਿੰਘ ਦੇ ਸਦੀਵੀ ਵਿਛੋੜੇ ਉਤੇ ਗਹਿਰੇ ਦੁੱਖ ਦਾ ਇਜ਼ਹਾਰ ਕੀਤਾ।  ਉਨ੍ਹਾਂ ਸਾਥੀ ਸੱਜਣ ਸਿੰਘ ਨੂੰ ਸ਼ਰਧਾ ਦੇ ਫੁੱਲ ਭੇਂਟ ਕਰਦੇ ਹੋਏ ਉਨ੍ਹਾਂ ਦੇ ਪਰਿਵਾਰ ਅਤੇ ਸਨੇਹੀਆਂ ਨਾਲ ਜ਼ਿਲ੍ਹਾ ਕੌਂਸਲ ਅਤੇ ਏਟਕ ਚੰਡੀਗੜ੍ਹ ਵੱਲੋਂ ਹਾਰਦਿਕ ਸੰਵੇਦਨਾ ਸਾਂਝੀ ਕੀਤੀ।