ਕਾਮਰੇਡ ਭਗਵਾਨ ਸਿੰਘ ਸੋਮਲ ਖੇੜੀ ਦੇ ਹੱਕ ਵਿੱਚ ਦੋਰਾਹਾ ਦੇ ਲੋਕ ਪੂਰੇ ਜੋਸ਼ ਵਿੱਚ

1st February 2022 at 3:33 PM

 ਦੋਰਾਹਾ ਵਿਖੇ ਸੀਪੀਆਈ ਦਾ ਚੋਣ ਦਫਤਰ ਖੁਲ੍ਹੇਗਾ ਤਿੰਨ ਫਰਵਰੀ ਨੂੰ 

ਦੋਰਾਹਾ: 1 ਫਰਵਰੀ 2022: (ਐਮ ਐਸ ਭਾਟੀਆ//ਹਰਮਿੰਦਰ ਸੇਠ//ਕਾਮਰੇਡ ਸਕਰੀਨ)::

ਦੋਰਾਹਾ ਉਹਨਾਂ ਇਲਾਕਿਆਂ ਵਿੱਚ ਰਿਹਾ ਹੈ ਜਿਹਨਾਂ ਨੇ ਖੱਬੀਆਂ ਤਾਕਤਾਂ ਦੀ ਚੜ੍ਹਤ ਲਈ ਹਰ ਹਾਲਤ ਵਿੱਚ ਆਪਣਾ ਯੋਗਦਾਨ ਦਿੱਤਾ। ਖੱਬੀਆਂ ਪਾਰਟੀਆਂ ਵੱਖ ਵੱਖ ਬੈਨਰਾਂ ਦੇ ਬਾਵਜੂਦ ਇਸ ਇਲਾਕੇ ਵਿੱਚ ਕਾਮਯਾਬ ਰਹੀਆਂ। ਸੰਘਰਸ਼ਾਂ ਦੀ ਲੋੜ ਪਈ ਤਾਂ ਦੋਰਾਹੇ ਦੇ ਲੋਕ ਵੱਧ ਚੜ੍ਹ ਕੇ ਯੋਗਦਾਨ ਪਾਉਂਦੇ ਰਹੇ। ਇਸ ਵਾਰ ਫੇਰ ਦੋਰਾਹੇ ਦੇ ਲੋਕਾਂ ਨੇ ਜ਼ੋਰ ਪਾ ਕੇ ਸੀਪੀਆਈ ਕੋਲੋਂ ਦੋਰਾਹੇ ਦੀਆਂ ਸਰਗਰਮੀਆਂ ਦੀ ਮੰਗ ਮਨਵਾਈ ਹੈ। ਕਾਮਰੇਡ ਭਗਵਾਨ ਸਿੰਘ ਸੋਮਲ ਨੂੰ ਖੜਾ ਕਰਨ ਦਾ ਫੈਸਲਾ ਦੋਰਾਹਾ ਇਲਾਕੇ ਦੇ ਲੋਕਾਂ ਦੀ ਮੰਗ ਨੂੰ ਮੁੱਖ ਰੱਖਦਿਆਂ ਵੀ ਕੀਤਾ ਗਿਆ। ਭਗਵਾਨ ਸੋਮਲ ਦੇ ਹੱਕ ਵਿੱਚ ਦੋਰਾਹਾ ਵਿਖੇ ਹੋਈ ਪਹਿਲੀ ਮੀਟਿੰਗ ਦੌਰਾਨ ਲੋਕਾਂ ਨੇ  ਭਾਰੀ ਉਤਸ਼ਾਹ ਦਿਖਾਇਆ। 

ਅੱਜ ਹਲਕਾ ਪਾਇਲ ਦੇ ਭਾਰਤੀ ਕਮਿਊਨਿਸਟ ਪਾਰਟੀ (ਸੀਪੀਆਈ) ਆਗੂਆਂ ਅਤੇ ਵਰਕਰਾਂ ਦੀ ਇਕ ਮੀਟਿੰਗ ਮੇਨ ਬਾਜ਼ਾਰ ਦੋਰਾਹਾ ਵਿਖੇ ਹੋਈ । ਇਸ ਵਿਚ ਹਲਕਾ ਪਾਇਲ ਦੇ ਬਲਾਕ ਦੋਰਾਹਾ ਦੇ ਮੈਂਬਰਾਂ ਨੇ ਹਿੱਸਾ ਲਿਆ। ਇਸ ਵਿੱਚ ਫ਼ੈਸਲਾ ਕੀਤਾ ਗਿਆ ਕਿ ਕਾਮਰੇਡ ਭਗਵਾਨ ਸਿੰਘ ਦਾ ਚੋਣ ਦਫ਼ਤਰ 3 ਤਰੀਕ ਨੂੰ 12.00 ਵਜੇ  ਦੋਰਾਹਾ ਦੇ ਮੇਨ ਬਾਜ਼ਾਰ ਵਿਚ ਖੋਲ੍ਹਣ ਦਾ ਫ਼ੈਸਲਾ ਕੀਤਾ ਗਿਆ। ਅੱਜ ਦੀ ਮੀਟਿੰਗ ਵਿਚ ਆਗੂਆਂ ਅਤੇ ਵਰਕਰਾਂ ਨੇ ਵਿਸ਼ਵਾਸ ਦਿਵਾਇਆ ਕਿ ਉਹ ਇਸ ਚੋਣ ਮੁਹਿੰਮ ਨੂੰ ਘਰ ਘਰ ਲੈ ਕੇ ਜਾਣਗੇ ਅਤੇ ਪਾਰਟੀ ਦੇ ਉਮੀਦਵਾਰ ਕਾਮਰੇਡ ਭਗਵਾਨ ਸਿੰਘ ਸੋਮਲਖੇੜੀ ਨੂੰ ਵੱਡੇ ਫ਼ਰਕ ਨਾਲ ਇਸ ਹਲਕੇ ਤੋਂ ਜਿਤਾਉਣਗੇ। 

ਮੀਟਿੰਗ ਵਿਚ ਉਮੀਦਵਾਰ ਕਾਮਰੇਡ ਭਗਵਾਨ ਸਿੰਘ ਤੋਂ ਇਲਾਵਾ ਲੁਧਿਆਣਾ ਤੋਂ  ਪਾਰਟੀ ਆਗੂ ਡਾ ਅਰੁਣ ਮਿੱਤਰਾ,  ਗੁਲਜ਼ਾਰ ਗੋਰੀਆ, ਚਮਕੌਰ ਸਿੰਘ ,ਐੱਮ ਐੱਸ ਭਾਟੀਆ ,ਚਰਨ ਸਰਾਭਾ ਅਤੇ ਵਿਜੇ ਕੁਮਾਰ ਨੇ ਹਿੱਸਾ ਲਿਆ।  ਦੋਰਾਹਾ  ਦੇ ਬਲਾਕ ਸਕੱਤਰ ਨਿਰੰਜਣ ਸਿੰਘ, ਹਰਵਿੰਦਰ ਸੇਠ, ਪਰਮਜੀਤ ਸਿੰਘ ਸਿਹੌੜਾ ਅਤੇ ਐਸ ਐਸ ਮਣਕੂ ਨੇ ਹਿੱਸਾ ਲਿਆ। ਸਮਰਾਲਾ ਬਲਾਕ ਤੋਂ ਕਾਮਰੇਡ ਕੇਵਲ  ਸਿੰਘ ਮਜਾਲੀਆ ਅਤੇ ਖੰਨਾ ਬਲਾਕ ਤੋਂ ਕਾਮਰੇਡ ਗੁਰਮੀਤ ਸਿੰਘ ਸ਼ਾਮਲ ਹੋਏ। ਇਨ੍ਹਾਂ ਤੋਂ ਇਲਾਵਾ ਕਾਮਰੇਡ ਰਾਮਆਧਾਤਰ ਸਿੰਘ ਅਤੇ ਰਾਮ ਚੰਦ ਵੀ ਸ਼ਾਮਲ ਹੋਏ।