ਖਰੜ: ਆਓ ਮਈ ਦਿਵਸ ਵਾਲੇ ਸ਼ਹੀਦਾਂ ਨਾਲ ਵਫਾ ਪਾਲੀਏ

1st May 2025 at 14:59 May Day at Kharar From H S Dalla

ਮੂੰਹ ਮੋੜਿਆ ਤਾਂ ਖੱਜਲ-ਖੁਆਰੀ ਸਿਰ 'ਤੇ ਕੂਕ ਰਹੀ ਹੈ 

ਸ਼ਿਕਾਗੋ ਦੇ ਸ਼ਹੀਦਾਂ ਤੇ ਪਹਿਲਗਾਮ ਵਿੱਚ ਮਾਰੇ ਨਿਰਦੋਸ਼ ਲੋਕਾਂ ਨੂੰ ਸ਼ਰਧਾਂਜਲੀ ਦਿੱਤੀ

ਖਰੜ: 01 ਮਈ 2025:(ਹਰਨਾਮ ਸਿੰਘ ਡੱਲਾ//ਇਨਪੁਟ-ਮੀਡੀਆ ਲਿੰਕ ਰਵਿੰਦਰ//ਕਾਮਰੇਡ ਸਕਰੀਨ ਡੈਸਕ):: 

ਜਦੋਂ ਮਸ਼ੀਨਾਂ ਨਹੀਂ ਸਨ ਹੁੰਦੀਆਂ। ਜਦੋਂ ਤਕਨੀਕ ਵੀ ਨਹੀਂ ਸੀ ਹੁੰਦੀ। ਜਦੋਂ ਮਕੈਨਕੀ ਵੀ ਆਮ ਨਹੀਂ ਸੀ ਆਈ। ਉਦੋਂ ਮਜ਼ਦੂਰਾਂ ਨੂੰ ਸਾਰੇ ਕੰਮ ਹੱਥੀਂ ਕਰਨੇ ਪੈਂਦੇ ਸਨ। ਮਜ਼ਦੂਰ  ਡਿਊਟੀ ਬੜੀ ਮਿਹਨਤ ਨਾਲ ਕਰਦੇ ਸਨ ਬੜੀ ਇਮਾਨਦਾਰੀ ਨਾਲ ਕਰਦੇ ਸਨ।  ਇਸਦੇ ਬਾਵਜੂਦ ਲੋਟੂ ਸਮਾਜ, ਅਜਾਰੇਦਾਰ ਸਮਾਜ ਉਦੋਂ ਵੀ ਇਨਸਾਨੀਅਤ ਨੂੰ ਭੁੱਲ ਕੇ ਉਹਨਾਂ ਦੇ ਕੰਮ ਵਾਲੇ ਘੰਟੇ ਅਤੇ ਮਿੰਟ ਬਦਨੀਤੀ ਨਾਲ  ਗਿਣ ਕੇ ਉਹਨਾਂ ਦੀਆਂ ਹੱਕੀ ਉਜਰਤਾਂ ਨਾਲ ਬੇਈਮਾਨੀ ਕਰਦਾ ਸੀ। ਇਹ ਮਈ ਵਾöਏ ਨੂੰ ਸ਼ਹਾਦਤਾਂ ਦਾ  ਜਾਮ  ਪੀਣ ਵਾਲੇ ਯੋਧੇ ਹੀ ਸਨ ਜਿਹਨਾਂ ਦੀਆਂ ਕੁਰਬਾਨੀਆਂ ਸਦਕਾ ਮਜ਼ਦੂਰਾਂ ਲਈ ਕੰਮ ਦੇ ਅੱਠ ਘੰਟੇ ਨਿਸਚਿਤ ਗਏ ਸਨ। 

ਹੁਣ ਜਦੋਂ ਕਿ ਕੰਪਿਊਟਰ ਵਾਲਾ ਯੁਗ ਆ ਗਿਆ ਹੈ। ਰੋਬੋਟਸ ਆ ਗਏ ਹਨ। ਉਦੋਂ ਕੰਮ ਦੇ ਘੰਟੇ ਤਾਂ ਸਿਰਫ ਦੋ ਚਾਰ ਹੀ ਰਹਿ ਜਾਣੇ ਚਾਹੀਦੇ ਸਨ ਅਤੇ ਕੰਮ ਦੇ ਦਿਨ ਵੀ ਹਫਤੇ ਵਿਚ ਘਟ ਜਾਣੇ ਚਾਹੀਦੇ ਸਨ। ਬਾਕੀ ਦੇ ਸਮੇਂ ਨੂੰ ਪੂਰੇ ਸਮਾਜ ਦੇ ਭਲੇ ਅਤੇ ਬੇਹਤਰੀ ਲਈ ਕੰਮ ਵਿਚ ਲਿਆਉਂਦਿਆਂ  ਬੜੀ ਇਮਾਨਦਾਰੀ ਨਾਲ ਵਰਤਿਆ ਜਾਣਾ ਚਾਹੀਦਾ ਸੀ। ਉਹਨਾਂ ਨਾਲ ਸੈਮੀਨਾਰ ਅਤੇ ਵਿਚਾਰ ਵਟਾਂਦਰੇ ਕਰਕੇ ਮਜ਼ਦੂਰਾਂ ਅੰਦਰ ਲੁਕੀ ਪ੍ਰਤਿਭਾ ਅਤੇ ਉਡਾਣ ਦਾ ਫਾਇਦਾ ਲਿਆ ਜਾਣਾ ਚਾਹੀਦਾ ਸੀ ਪਰ ਹੁਣ ਵੀ ਅਜਾਰੇਦਾਰਾਂ ਦਾ ਇੱਕ ਵੱਡਾ ਵਰਗ ਮਜ਼ਦੂਰਾਂ ਦੀ ਰੱਤ ਨਿਚੋੜਨ 'ਤੇ ਬਜ਼ਿੱਦ ਹੈ। 

ਕੰਮ ਦੇ ਘੰਟੇ ਫਿਰ ਬਾਰਾਂ ਕੀਤੇ ਗਏ ਹਨ। ਸ਼ਾਇਦ ਵੀ ਵਧਾਇਆ ਜਾਵੇ। ਸਾਨੂੰ ਮਈ ਦਿਵਸ ਮੌਕੇ ਇਹ ਸੋਚਣਾ ਚਾਹੀਦਾ ਸੀ ਕਿ ਅਸੀਂ ਮਜ਼ਦੂਰ ਹੱਕਾਂ 'ਤੇ ਪੈ ਰਾਹਗੇ ਡਾਕਿਆਂ ਨੂੰ ਰੋਕਣ ਲਈ ਕੀ ਕਰਨਾ ਹੈ ਅਤੇ ਕਿਵੇਂ ਕਰਨਾ ਹੈ। ਸਮਾਂ ਅਤੇ ਕਾਨੂੰਨ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਭਿਆਨਕ ਰੂਪ ਵਿਚ ਸਾਡੇ ਸਾਹਮਣੇ ਹਨ। ਕੀ ਅਸੀਂ ਆਪਣੀਆਂ ਪਾਰਟੀਆਂ ਅਤੇ ਲੀਡਰਾਂ ਨੂੰ ਇਸ ਨਾਜ਼ੁਕ ਸਥਿਤੀ ਬਾਰੇ ਕਦੇ ਕੁਝ ਪੁੱਛਿਆ ਹੈ? ਖਰੜ ਵਿੱਚ ਅਜਿਹੇ ਸੁਆਲਾਂ ਅਤੇ ਮੁੱਦਿਆਂ ਬਾਰੇ ਚਰਚਾ ਦੀ ਉਮੀਦ ਸਭ ਤੋਂ ਜ਼ਿਆਦਾ ਸੀ ਕਿਓਂਕਿ ਸ਼ਾਇਰ, ਲੇਖਕ ਅਤੇ ਹੋਰ ਬੁਧੀਜੀਵੀ ਇਥੇ ਜ਼ਿਆਦਾ ਸਰਗਰਮ ਰਹਿੰਦੇ ਹਨ। ਸਮਾਗਮ ਪਹਿਲਾਂ ਨਿਸਚਿਤ ਪ੍ਰੋਗਰਾਮ ਮੁਤਾਬਿਕ ਅੱਜ ਵੀ ਹੋਇਆ। 

ਅੱਜ ਸਵੇਰੇ ਲੇਬਰ ਚੌਕ ਖਰੜ ਵਿਖੇ ਮਜ਼ਦੂਰ ਦਿਵਸ ਮਨਾਉਣ ਮੌਕੇ ਸ਼ਹਿਰ ਸ਼ਿਕਾਗੋ ਤੇ ਜੰਮੂ ਕਸ਼ਮੀਰ ਦੇ ਪਹਿਲਗਾਮ ਵਿੱਚ ਮਾਰੇ ਨਿਰਦੋਸ਼ ਲੋਕਾਂ ਨੂੰ ਦੋ ਮਿੰਟ ਦਾ ਮੌਨ ਧਾਰਨ ਕਰਕੇ ਸ਼ਰਧਾਂਜਲੀ ਦਿੱਤੀ ਗਈ। ਸੈਂਟਰ ਆਫ ਇੰਡੀਅਨ ਟਰੇਡ ਯੂਨੀਅਨ (ਸੀਟੂ) ਮੋਹਾਲੀ, ਗ਼ਦਰੀ ਬਾਬੇ ਵਿਚਾਰਧਾਰਕ ਮੰਚ (ਪੰਜਾਬ) ਖਰੜ, ਪੰਜਾਬ ਬਿਜਲੀ ਨਿਗਮ ਮੰਡਲ ਖਰੜ ਅਤੇ ਐੱਮ ਐੱਸ ਯੂ ਮੰਡਲ ਖਰੜ ਵੱਲੋਂ ਮਨਾਏ ਗਏ ਇਸ ਸਮਾਗਮ ਦੀ ਪ੍ਰਧਾਨਗੀ ਸੁਰਿੰਦਰ ਸਿੰਘ ਬਡਾਲਾ,ਰਾਮ ਕਿਸ਼ਨ ਧੁਨਕੀਆ ਅਤੇ ਸੁਖਵਿੰਦਰ ਸਿੰਘ ਦੁਮਣਾ ਨੇ ਕੀਤੀ। ਇਸ ਮੌਕੇ ‘ਤੇ ਹਰਜਿੰਦਰਪਾਲ ਸਿੰਘ ਡੱਲਾ ਨੇ ਲਾਲ ਝੰਡੇ ਦਾ ਗੀਤ ਸੁਣਾਇਆ ਅਤੇ ਜਗਦੇਵ ਸਿੰਘ ਰਡਿਆਲਾ ਨੇ ਵੀ ਕਵਿਤਾ ਪੇਸ਼ ਕੀਤੀ। 

ਉਪਰੰਤ ਤਰਲੋਚਨ ਸਿੰਘ, ਮੈਡਮ ਸਵਰਨਜੀਤ ਕੌਰ, ਮੰਗਤ ਖਾਨ, ਰਾਮ ਕਿਸ਼ਨ ਧੁਨਕੀਆ, ਕੰਮਲਜੀਤ ਸਿੰਘ,ਬਲਵਿੰਦਰ ਸਿੰਘ ਟੈਕਨੀਕਲ ਸਰਵਿਸਿਜ਼ ਯੂਨੀਅਨ,ਪਰਮਜੀਤ ਸਿੰਘ ਸਕੱਤਰ ਸੀ ਪੀ ਐੱਮ ਤਹਿ:ਖਰੜ ਨੇ ਹਾਜ਼ਰੀਨ ਨਾਲ ਵਿਚਾਰ ਸਾਂਝੇ ਕਰਦਿਆਂ ਕਿਹਾ ਕਿ ਕੇਂਦਰ ਦੀ ਬੀਜੇਪੀ ਸਰਕਾਰ ਕਿਰਤੀਆਂ ਖਿਲਾਫ਼ ਚਾਰ ਕੋਡ ਬਿੱਲ ਪਾਸ ਕਰਕੇ ਆਪਣੇ ਆਪ ਨੂੰ ਮਜ਼ਦੂਰ ਵਿਰੋਧੀ ਸਾਬਿਤ ਕਰ ਚੁੱਕੀ ਹੈ ਅਤੇ ਕਾਰਪੋਰੇਟ ਘਰਾਣਿਆਂ ਦੀ ਚਹੇਤੀ ਵੀ ਬਹੁਤ ਹੈ। 

ਇਹਨਾਂ ਕਾਲੇ ਕਾਨੂੰਨਾਂ ਵਿਰੁੱਧ ਮਜ਼ਦੂਰ ਜਥੇਬੰਦੀਆਂ ਲਗਾਤਾਰ ਸੰਘਰਸ਼ ਕਰ ਰਹੀਆਂ ਹਨ ਅਤੇ 20 ਮਈ 2025 ਨੂੰ ਦੇਸ਼ ਵਿਆਪੀ ਹੜਤਾਲ ਦਾ ਐਲਾਨ ਕਰ ਚੁੱਕੀਆਂ ਹਨ। ਵੱਖ-ਵੱਖ ਬੁਲਾਰਿਆਂ ਨੇ ਦੇਸ਼ ਭਰ ਕੀਤੀ ਜਾ ਰਹੀ ਹੜਤਾਲ ਦੀ ਹਮਾਇਤ ਕੀਤੀ ਹੈ। ਉਨ੍ਹਾਂ ਦੇਸ਼ ਵਿੱਚ ਚੱਲ ਰਹੀ ਫਿਰਕੂ ਹਿੰਸਾ ਦਾ ਵਿਰੋਧ ਕੀਤਾ ਅਤੇ ਪਹਿਲਗਾਮ ਵਿੱਚ ਮਾਰੇ ਗਏ ਆਮ ਸ਼ਹਿਰੀਆਂ ਦੇ ਪਰਿਵਾਰਾਂ ਨਾਲ ਹਮਦਰਦੀ ਪ੍ਰਗਟ ਕੀਤੀ। ਸ੍ਰੀ ਗੁਰੂ ਰਵਿਦਾਸ ਸਭਾ ਰਜਿ: ਖਰੜ ਦੇ ਪ੍ਰਧਾਨ ਮਦਨ ਲਾਲ ਜਨਾਗਲ ਨੇ ਮਜ਼ਦੂਰਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਉਹਨਾਂ ਦੀ ਸਭਾ ਗ਼ਰੀਬ ਬੱਚਿਆਂ ਦੀ ਉਚੇਰੀ ਪੜ੍ਹਾਈ ਲਈ ਮਦਦ ਕਰੇਗੀ ਕੋਈ ਵੀ ਮਜ਼ਦੂਰ ਆਪਣੇ ਬੱਚੇ ਦੀ ਪੜ੍ਹਾਈ ਲਈ ਮਦਦ ਲਈ ਸਾਨੂੰ ਮਿਲ ਸਕਦਾ ਹੈ। ਸੁਖਵਿੰਦਰ ਸਿੰਘ ਦੁੱਮਣਾ ਨੇ ਇਕੱਤਰ ਹੋਏ ਮੁਲਾਜ਼ਮਾਂ ਤੇ ਮਜ਼ਦੂਰਾਂ ਨੂੰ ਕਿਹਾ ਕਿ 20 ਮਈ ਦੀ ਦੇਸ਼ ਵਿਆਪੀ ਹੜਤਾਲ ਵਿੱਚ ਵੱਧ ਤੋਂ ਵੱਧ ਸ਼ਮੂਲੀਅਤ ਕੀਤੀ ਜਾਵੇ।

ਉਂਝ ਪੁੱਛਣਾ ਤਾਂ ਇਹ ਵੀ ਬਣਦਾ ਹੈ ਕਿ ਸਰਕਾਰੀ ਅਦਾਰਿਆਂ ਦੇ ਨਾਲ ਨਾਲ ਪ੍ਰਾਈਵੇਟ ਫੈਕਟਰੀਆਂ ਅਤੇ ਅਦਾਰਿਆਂ ਵਿੱਚ ਮਈ ਦਿਵਸ ਦੀ ਛੁੱਟੀ ਇਸ ਵਾਰ ਵੀ ਕਿਓਂ ਨਹੀਂ ਹੋਈ? ਜਿਸ ਸਮਾਜ ਅਤੇ ਜਿਹਨਾਂ ਘਰਾਣਿਆਂ ਲਈ ਮਜ਼ਦੂਰ ਉਮਰ ਭਰ ਆਪਣਾ ਜਿਸਮ ਤੋੜ ਕੇ ਕੰਮ ਕਰਦੇ ਹਨ, ਉਹਨਾਂ ਦੇ ਖਜ਼ਾਨੇ ਭਰਦੇ ਹਨ ਉਹਨਾਂ ਨੇ ਕਿੰਨੇ ਕੁ ਮਜ਼ਦੂਰਾਂ ਨੂੰ ਤੋਹਫੇ, ਰਾਸ਼ਨ-ਪਾਣੀ, ਦਵਾਈਆਂ ਅਤੇ ਹੋਰ ਧੰਨ ਦੌਲਤ ਨਾਲ ਕਿੰਨੀ ਕੁ ਮਦਦ ਕੀਤੀ ਹੈ? 

ਆਓ ਸੋਚੀਏ, ਵਿਚਾਰੀਏ ਅਤੇ ਮਈ ਦਿਵਸ ਦੇ ਸ਼ਹੀਦਾਂ ਨਾ ਵਫਾ ਪਾਲੀਏ ਤਾਂ ਹੀ ਹੀ ਸਾਰਥਕ ਹੋਵੇਗਾ ਇਸ ਦਿਨ ਨੂੰ ਮਨਾਉਣਾ।  ਮਈ ਦਿਵਸ ਦੇ ਸ਼ਹੀਦਾਂ ਅਤੇ ਉਹਨਾਂ ਦੀਆਂ ਪ੍ਰਪਤੀਆਂ ਨੂੰ ਭੁੱਲ ਗਏ ਤਾਂ ਭਿਆਨਕ ਸਮਾਂ ਸਾਡੇ ਲਈ ਹੀ  ਹੈ। ਆਓ ਸ਼ਹੀਦਾਂ ਦੇ ਮਕਸਦ ਨੂੰ ਯਾਦ ਰੱਖੀਏ। 

ਸਮਾਜਿਕ ਚੇਤਨਾ ਅਤੇ ਜਨ ਸਰੋਕਾਰਾਂ ਨਾਲ ਜੁੜੇ  ਹੋਏ ਬਲਾਗ ਮੀਡੀਆ ਨੂੰ ਜਾਰੀ ਰੱਖਣ ਵਿੱਚ ਸਹਿਯੋਗੀ ਬਣੋ। ਜੋ ਵੀ ਰਕਮ ਤੁਸੀਂ ਹਰ ਰੋਜ਼, ਹਰ ਹਫਤੇ, ਹਰ ਮਹੀਨੇ ਜਾਂ ਕਦੇ ਕਦਾਈਂ ਇਸ ਸ਼ੁਭ ਕੰਮ ਲਈ ਕੱਢ ਸਕਦੇ ਹੋ ਉਹ ਜ਼ਰੂਰ ਕੱਢੋ। ਹੇਠਲੇ ਬਟਨ 'ਤੇ ਕਲਿੱਕ ਕਰ ਕੇ ਤੁਸੀਂ ਸਹਿਜੇ ਹੀ ਅਜਿਹਾ ਕਰ ਸਕਦੇ ਹੋ।