ਮਜ਼ਦੂਰ ਵਿਰੋਧੀ ਲੇਬਰ ਕੋਡ ਲਾਗੂ ਨਹੀਂ ਹੋਣ ਦਿਆਂਗੇ

From M S Bhatia WhatsApp on 7th December 2025 at 16:21 Regarding New Labor Codes 

ਟਰੇਡ ਯੂਨੀਅਨ ਆਗੂਆਂ ਵਲੋਂ ਸਪਸ਼ਟ ਐਲਾਨ

ਸਾਂਝੇ ਫਰੰਟ ਵੱਲੋਂ ਲੇਬਰ ਕੋਡਾਂ ਦੇ ਮਾੜੇ ਪ੍ਰਭਾਵਾਂ ਬਾਰੇ ਵਰਕਰਾਂ ਦੀ ਕੰਨਵੈਂਸ਼ਨ

ਲੁਧਿਆਣਾ: 07 ਦਸੰਬਰ 2025: (ਮੀਡਿਆ ਲਿੰਕ 32//ਕਾਮਰੇਡ ਸਕਰੀਨ ਡੈਸਕ)::

ਯੂਨਾਈਟਿਡ ਫਰੰਟ ਆਫ ਟਰੇਡ ਯੂਨੀਅਨਜ਼ ਲੁਧਿਆਣਾ ਵੱਲੋਂ ਅੱਜ ਸ਼ਹੀਦ ਕਰਨੈਲ ਸਿੰਘ ਈਸੜੂ ਭਵਨ ਵਿਖੇ ਲੇਬਰ ਕੋਡਾਂ ਦੇ ਕਾਮਿਆਂ ਦੇ  'ਤੇ  ਮਾੜੇ ਪ੍ਰਭਾਵਾਂ ਬਾਰੇ ਵਰਕਰਾਂ ਦੀ ਕਨਵੈਂਸ਼ਨ ਕੀਤੀ ਗਈ, ਜਿਸ ਵਿੱਚ ਏਟਕ,  ਸੀਟੂ, ਸੀਟੀਯੂ ਪੰਜਾਬ ਅਤੇ ਇੰਟਕ ਦੇ ਆਗੂਆਂ ਅਤੇ ਵਰਕਰਾਂ ਨੇ ਵੱਡੀ ਗਿਣਤੀ ਵਿੱਚ ਹਿੱਸਾ ਲਿਆ।

ਵਰਕਰਾਂ ਨੂੰ ਸੰਬੋਧਨ ਕਰਦੇ ਹੋਏ ਯੂਨੀਅਨ ਆਗੂਆਂ ਨੇ ਕਿਹਾ ਕਿ 21 ਨਵੰਬਰ 2025 ਨੂੰ ਜਾਰੀ ਨੋਟੀਫਿਕੇਸ਼ਨ ਲੋਕਤਾਂਤਰਿਕ ਪ੍ਰਕਿਰਿਆ ਨੂੰ ਨਜ਼ਰਅੰਦਾਜ਼ ਕਰਦੇ ਹੋਏ ਮਿਹਨਤਕਸ਼ ਲੋਕਾਂ ਵੱਲੋਂ ਪਿਛਲੇ 150 ਸਾਲ ਵਿੱਚ ਸੰਘਰਸ਼ਾਂ ਰਾਹੀਂ ਪ੍ਰਾਪਤ ਕੀਤੇ ਲੇਬਰ ਕਾਨੂੰਨ ਦਾ ਨੂੰ ਖਤਮ ਕਰਕੇ ਸਰਕਾਰ ਨੇ ਮਜ਼ਦੂਰਾਂ ਦੀ ਜ਼ਿੰਦਗੀ, ਹੱਕਾਂ ਅਤੇ ਰੋਜ਼ਗਾਰ ਸੁਰੱਖਿਆ 'ਤੇ ਗੰਭੀਰ ਹਮਲਾ ਕੀਤਾ ਹੈ। ਟਰੇਡ ਯੂਨੀਅਨਾਂ ਪਿਛਲੇ 10 ਸਾਲ ਤੋਂ ਇੰਡੀਅਨ ਲੇਬਰ ਕਾਨਫਰੰਸ ਬੁਲਾਉਣ ਦੀ ਮੰਗ ਕਰ ਰਹੀ ਆ ਹਨ ਪਰ ਸਰਕਾਰ ਇਸ ਪਾਸੇ ਧਿਆਨ ਨਹੀਂ ਦੇ ਰਹੀ। 

ਮੋਦੀ ਸਰਕਾਰ ਆਪਣੇ ਪ੍ਰਚਾਰ ਤੰਤਰ ਰਾਹੀਂ ਅਤੇ ਆਪਣੀ ਹੱਥਠੋਕਾ ਟਰੇਡ ਯੂਨੀਅਨ ਬੀਐਮਐਸ ਰਾਹੀਂ ਇਹਨਾਂ ਲੇਬਰ ਕੋਡਾ ਦੇ ਫਾਇਦੇ ਗਿਣਾ ਕੇ ਦੇਸ਼ ਦੀ ਜਨਤਾ ਨੂੰ ਭਰਮਾ ਰਹੀ ਹੈ।

29 ਲੇਬਰ ਕਾਨੂੰਨਾਂ ਨੂੰ ਖਤਮ ਕਰਕੇ ਜੋ ਚਾਰ ਕੋਡ ਜਾਰੀ ਕੀਤੇ ਗਏ ਹਨ ਉਹਨਾਂ ਦਾ ਮੋਟੇ ਤੌਰ ਤੇ ਜੋ  ਬੁਰੇ ਪ੍ਰਭਾਵ ਪੈਣ ਵਾਲੇ ਹਨ, ਉਹ ਹਨ:

*ਨੈਸ਼ਨਲ ਫਲੋਰ ਲੈਵਲ ਵੇਜ਼ ਦਾ 4628/—ਰੁਪਏ ਮਹੀਨਾ ਜਾਂ 178 ਰੁਪਏ ਦਿਹਾੜੀ ਕਰਨਾ, ਕੰਮ ਦੇ ਘੰਟੇ 8 ਤੋਂ ਵਧਾਕੇ 12 ਕਰਨੇ, ਕਿਸੇ ਵੀ ਇੰਡਸਟਰੀ ਜਾਂ ਅਦਾਰੇ ਨੂੰ ਜਿਸ ਵਿੱਚ 300 ਤੱਕ ਮਜਦੂਰ ਕੰਮ ਕਰਦੇ ਹੋਣ ਨੂੰ ਬਿਨਾਂ ਸਰਕਾਰ ਦੀ ਮਨਜੂਰੀ ਤੋਂ ਬੰਦ ਕਰਕੇ ਮਜਦੂਰਾਂ ਨੂੰ ਵਿਹਲੇ ਕਰ ਦੇਣਾ, ਪਹਿਲਾਂ ਜਿਥੇ 100 ਮਜਦੂਰ ਕੰਮ ਕਰਦੇ ਸਨ ਉਸ ਅਦਾਰੇ ਨੂੰ ਬੰਦ ਕਰਨ ਲਈ ਸਰਕਾਰ ਤੋਂ ਮਨਜੂਰੀ ਲੈਣੀ ਜਰੂਰੀ ਸੀ।

*90 ਫੀਸਦੀ ਤੋਂ ਵੱਧ ਇੰਡਸਟਰੀ ਦੇ ਮਾਲਕਾਂ ਨੂੰ ਮਜ਼ਦੂਰਾਂ ਨੂੰ ਜਦੋਂ ਮਰਜ਼ੀ ਕੱਢਣ ਦਾ ਅਧਿਕਾਰ ਦੇ ਦਿੱਤਾ ਗਿਆ ਹੈ, ਯੂਨੀਅਨ ਦੀ ਰਜਿਸਟ੍ਰੇਸ਼ਨ ਕਰਾਉਣੀ ਬੇਹੱਦ ਮੁਸ਼ਕਲ ਕਰ ਦਿੱਤੀ ਗਈ ਹੈ। 

ਜਿੱਥੇ ਪਹਿਲਾਂ ਸਿਰਫ 7 ਮਜਦੂਰ ਰਜਿਸਟ੍ਰੇਸ਼ਨ ਕਰਾ ਸਕਦੇ ਸਨ, ਹੁਣ ਇਹ ਗਿਣਤੀ ਵਧਾਕੇ ਮਜ਼ਦੂਰਾਂ ਦੀ ਕੁੱਲ ਸੰਖਿਆ ਦਾ 10 ਫੀਸਦੀ ਕਰ ਦਿੱਤਾ ਗਿਆ ਹੈ। ਔਰਤਾਂ ਦੇ ਮੈਟਰਨਿਟੀ ਬੈਨੀਫਿਟਸ ਵਿੱਚ ਤਨਖਾਹ ਸਮੇਤ ਛੁੱਟੀ ਆਦਿ ਸਮੇਤ ਕਾਫੀ ਕਟੌਤੀਆਂ ਕਰ ਦਿੱਤੀਆਂ ਗਈਆਂ ਹਨ। ਹੜ੍ਹਤਾਲ ਕਰਨ ਲਈ ਹੁਣ 60 ਦਿਨਾਂ ਦਾ ਨੋਟਿਸ ਦੇਣਾ ਪਵੇਗਾ ਅਤੇ ਹੜ੍ਹਤਾਲ ਕਰਨ ਦੀ ਸੂਰਤ ਵਿੱਚ 51 ਫੀਸਦੀ ਵਰਕਰਾਂ ਦੇ ਦਸਤਖਤ ਕਰਵਾਕੇ ਸਹਿਮਤੀ ਲੈਣੀ ਪਵੇਗੀ। ਜੇਕਰ ਹੜ੍ਹਤਾਲ 49 ਫੀਸਦੀ ਰਹਿ ਜਾਂਦੀ ਹੈ ਤਾਂ ਉਹ ਗੈਰਕਾਨੂੰਨੀ ਘੋਸ਼ਿਤ ਕਰ ਦਿੱਤੀ ਜਾਵੇਗੀ ਅਤੇ ਅਜਿਹੀ ਹੜ੍ਹਤਾਲ ਕਰਨ ਅਤੇ ਕਰਵਾਉਣ ਵਾਲੇ ਆਗੂਆਂ ਵਿਰੁੱਧ ਕੇਸ ਦਰਜ ਹੋਣਗੇ ਅਤੇ ਕੈਦ ਕਰਨ ਦੀ ਵਿਵਸਥਾ ਕੀਤੀ ਗਈ ਹੈ।

ਬੁਲਾਰਿਆਂ ਨੇ ਕਿਹਾ ਕਿ ਇਹਨਾਂ ਕੋਡਾਂ ਦੇ ਵਿਰੁੱਧ ਲਗਾਤਾਰ ਸੰਘਰਸ਼ ਜਾਰੀ ਰੱਖਿਆ ਜਾਏਗਾ ਤੇ ਇਸ ਨੂੰ ਹੋਰ ਤਿੱਖਾ ਕੀਤਾ ਜਾਏਗਾ। ਸਰਕਾਰ ਦੇ ਕਾਰਪੋਰੇਟ ਪੱਖੀ ਅਤੇ ਲੋਕ ਵਿਰੋਧੀ ਕਾਮਿਆਂ ਦੇ ਵਿਰੋਧੀ ਰਵਈਏ ਦੇ ਵਿਰੁੱਧ ਦੇਸ਼ ਦੀ ਮਜ਼ਦੂਰ ਜਮਾਤ ਦੇ ਨਾਲ ਲੁਧਿਆਣਾ ਦੀਆਂ ਟ੍ਰੇਡ ਯੂਨੀਅਨਾਂ ਵੀ ਲਗਾਤਾਰ ਸੰਘਰਸ਼ ਵਿੱਚ ਵੱਧ ਚੜ ਕੇ ਸ਼ਾਮਿਲ ਹੋਣਗੀਆਂ।

ਜਿਨਾਂ ਆਗੂਆਂ ਨੇ ਸੰਬੋਧਨ ਕੀਤਾ  ਉਹਨਾਂ ਵਿੱਚ ਸੀਟੂ ਪੰਜਾਬ ਦੇ ਪ੍ਰਧਾਨ ਕਾਮਰੇਡ ਚੰਦਰ ਸ਼ੇਖਰ ਅਤੇ ਸੁਖਮਿੰਦਰ ਸਿੰਘ ਲੋਟੇ, ਏਟਕ ਪੰਜਾਬ ਦੇ ਸਕੱਤਰ ਕਾਮਰੇਡ ਐਮ.ਐੱਸ. ਭਾਟੀਆ ਅਤੇ ਕਾਮਰੇਡ ਕੇਵਲ ਸਿੰਘ ਬਣਵੈਤ, ਡਾਕਟਰ ਅਰੁਣ ਮਿੱਤਰਾ, ਸੀਟੀਯੂ ਪੰਜਾਬ ਦੇ ਆਗੂ ਬਲਰਾਜ ਸਿੰਘ ਅਤੇ ਜਗਦੀਸ਼ ਚੰਦ, ਇੰਟਕ ਵਲੋਂ ਐਡਵੋਕੇਟ ਸਰਬਜੀਤ ਸਿੰਘ ਸਰਹਾਲੀ, ਕਾਮਰੇਡ ਚਿਤਰੰਜਨ, ਰਾਮ ਬਿ੍ਕਸ਼ ਯਾਦਵ,ਰਮੇਸ਼ ਰਤਨ ਆਦਿ ਸ਼ਾਮਿਲ ਸਨ।

ਇਸ ਕਨਵੈਂਸ਼ਨ ਦੀ ਪ੍ਰਧਾਨਗੀ ਵਿਜੇ ਕੁਮਾਰ , ਜੋਗਿੰਦਰ ਰਾਮ, ਪਰਮਜੀਤ ਸਿੰਘ ਅਤੇ ਗੁਰਜੀਤ ਸਿੰਘ ਜਗਪਾਲ 'ਤੇ ਅਧਾਰਤ ਪ੍ਰਧਾਨਗੀ ਮੰਡਲ ਨੇ ਕੀਤੀ।

ਇਸ ਮੌਕੇ ਤੇ ਹੋਰ ਜਿਹੜੇ ਟਰੇਡ ਯੂਨੀਅਨ ਆਗੂ ਹਾਜ਼ਰ ਸਨ ਉਹਨਾਂ ਵਿੱਚ ਕਾਮਰੇਡ , ਕਾਮੇਸ਼ਵਰ ਯਾਦਵ, ਨਰੇਸ਼ ਗੌੜ, ਟਾਈਗਰ ਸਿੰਘ,ਅਵਤਾਰ ਛਿੱਬੜ, ਡਾਕਟਰ ਗੁਲਜਾਰ ਪੰਧੇਰ , ਮਲਕੀਤ ਸਿੰਘ ਮਾਲੜਾ, ਚਮਕੌਰ ਸਿੰਘ ਬਰਮੀ ਆਦਿ ਸ਼ਾਮਿਲ ਸਨ।